ԱՄՆ Carl Vinson ավիակիրը կիրակի ժամանել է հարավկորեական Բուսան նավահանգիստ՝ ի նշան ուժի ցուցադրության Հյուսիսային Կորեային։
ԱՄՆ նախագահ Դոնալդ Թրամփի պաշտոնամուտից ի վեր առաջին դեպքն է, երբ ամերիկյան ավիակիրը մուտք է գործում հարավկորեական նավահանգիստ:
Հարավային Կորեայի ռազմածովային նավատորմի հայտարարության մեջ ասված է, որ այցը՝ տարածաշրջանում զսպմանն ուղղված ԱՄՆ-ի «անխախտելի» հանձնառության մասն է և Սեուլ-Վաշինգտոն ռազմական դաշինքի ցուցադրություն՝ հակազդելու Հյուսիսային Կորեայից բխող սպառնալիքներին:
Միջուկային էներգիայով աշխատող ավիակրին, որը հանդիսանում է Carrier Strike Group 1-ի մասը, ուղեկցում են կառավարվող հրթիռներ զինված «Փրինսթոն» ու «Սթերեթ» ռազմանավերը։
«Մեր ներկայությունը Բուսանում ակնհայտորեն ցույց է տալիս Կորեայի Հանրապետության և Միացյալ Նահանգների միջև ամուր դաշինքը, ինչպես նաև մեր դաշնակիցների հետ վարժանքներ անցկացնելու ու գործելու մեր կարողությունը», - երկուշաբթի հայտարարել է Carrier Strike Group 1-ի հրամանատար փոխ-ծովակալ Մայքլ Վոսյեն:
«Յուրաքանչյուր համատեղ նավարկություն կամ թռիչք մեզ ավելի ուժեղ է դարձնում»,- հավելել է նա։
Հյուսիսային Կորեայի առաջնորդ Կիմ Չեն Ընը անձամբ էր ներկա այս փետրվարին տեղի ունեցած ռազմավարական նշանակության թևավոր հրթիռների փորձարկումներին և, ըստ հաղորդագրությունների, հրամայել է լիարժեք պատրաստության վիճակի բերել երկրի միջուկային ուժերը:
Սա ամերիկյան ավիակիրի առաջին այցն է Հարավային Կորեա այն բանից հետո, երբ անցած տարվա հունիսին USS Theodore Roosevelt ավիակիրըը ժամանել էր Բուսան՝ մասնակցելու համատեղ զորավարժություններին:
Carl Vinson-ը նախկինում այցելել էր Բուսան 2023 թվականի նոյեմբերին:
Փհենյանն ավանդաբար կտրուկ է արձագանքում Հարավային Կորեայում ամերիկյան ռազմական ուժերի տեղակայմանը։ Իր առաջին պաշտոնավարման ընթացքում Թրամփը աննախադեպ հանդիպում անցկացրեց Կիմ Չեն Ընի հետ՝ շեշտը դնելով միջանձնային հարաբերությունների բարելավման վրա։
ԱՄՆ նախագահը նախկինում հայտարարել է, թե մտադիր է վերականգնել Հյուսիսային Կորեայի առաջնորդի հետ շփումը, սակայն հյուսիսկորեական պետական լրատվամիջոցներում դեռ կարելի է հանդիպել սուր քննադատության Վաշինգտոնի և նրա դաշնակիցների հասցեին, որոնց Փհենյանը համարում է անվտանգության սպառնալիք:
