ԱՄՆ պետքարտուղար Մարկո Ռուբիոն երեքշաբթի հանդիպել է Ռուսաստանի արտգործնախարար Սերգեյ Լավրովին, որին, հիշեցնենք, նախորդել էր այս փետրվարի 12-ին ԱՄՆ և Ռուսաստանի նախագահներ Դոնալդ Թրամփի ու Վլադիմիր Պուտինի հայտնի հեռախոսազրույցը։ Հանդիպումը կայացել է Սաուդյան Արաբիայի մայրաքաղաքում՝ Էր-Ռիադում։
Պետքարտուղար Ռուբիոյին ուղեկցում էին ԱՄՆ նախագահի ազգային անվտանգության հարցերով խորհրդական Մայք Ուոլցը և Մերձավոր Արևելքի հարցերով հատուկ բանագնաց Սթիվ Վիտկոֆը: ԱՄՆ բանակցային թիմն ընտրվել է նախագահ Թրամփի կողմից՝ Մոսկվայի հետ հարաբերությունները վերականգնելու նպատակով:
Արտգործնախարար Լավրովին հետ միասին բանակցություններին մասնակցում էր Ռուսաստանի նախագահի օգնական Յուրի Ուշակովը։
Հանդիպման վերաբերյալ հաղորդագրությամբ է հանդես եկել ԱՄՆ Պետքարտուղարության խոսնակ Թեմմի Բրյուսը՝ ընդգծելով, թե նախագահ Դոնալդ Թրամփը ցանկանում է դադարեցնել մահերը, Միացյալ Նահանգների նպատակը խաղաղությունն և Վաշինգտոնն օգտագործում է աշխարհում իր ամուր դիրքերը՝ երկրները միավորելու համար։
«Նախագահ Թրամփը միակ առաջնորդն է աշխարհում, ով կարող է ստիպել Ուկրաինային և Ռուսաստանին համաձայնել դրան», - նշել է Բրյուսը։
Կողմերը պայմանավորվել են ստեղծել խորհրդատվական մեխանիզմ՝ կարգավորելու Ռուսաստանի և Միացյալ Նահանգների դիվանագիտական առաքելությունների աշխատանքը և նշանակել համապատասխան բարձր մակարդակի խմբեր՝ Ուկրաինայում հակամարտությունն արագ կերպով դադարեցնելու ուղիներ գտնելու համար, որը պետք է լինի կայուն և ընդունելի բոլոր կողմերի համար։
Կողմերը նաև պայմանավորվել են ապագա համագործակցության հիմքը դնել աշխարհաքաղաքական նշանակության փոխադարձ հետաքրքրություն ներկայացնող հարցերի, տնտեսական և ներդրումային հնարավորությունների շուրջ, որոնք ի հայտ կգան Ուկրաինայի հակամարտության հաջող հանգուցալուծումից հետո:
Էր-Ռիադում կայացած հանդիպումների մասնակիցները պարտավորվել են շարունակել իրենց փոխգործակցությունը՝ արդյունավետ առաջընթաց ապահովելու համար:
«Մեկ հեռախոսազանգը և մեկ հանդիպումը բավարար չեն կայուն խաղաղություն հաստատելու համար», - նշված է Բրյուսի հայտարարության մեջ: «Պետք է գործենք: Այսօր կարևոր քայլ ենք արել դեպի առաջ»:
Պետքարտուղարությունը շնորհակալություն է հայտնել Սաուդյան Արաբիայի Թագավորության գահաժառանգ արքայազն Մուհամմեդ բեն Սալման Ալ Սաուդին՝ հանդիպումը հյուրընկալելու համար։
