Անօրինական գաղտնի անցումը կապում էր Մեքսիկայի Սյուդադ Խուարես քաղաքը և ԱՄՆ Տեխասի նահանգի Էլ Պասո քաղաքին: Ռիո Գրանդե գետի տակով փորված թունելի լայնությունը մեկ մետրից փոքր-ինչ ավելին է, իսկ բարձրությունը՝ մոտ երկու մետր: Այն միանում է հեղեղատար կոյուղու համակարգին և ապահովված է լուսավորությամբ ու օդափոխությամբ։
«Ինչպես տեսնում եք, այն երեսպատված է փայտով՝ փլուզումները կանխելու համար»,- նշել է Սյուդադ Խուարեսի զինվորական կայազորի հրամանատար, գեներալ Խոսե Լեմուս Սիսներոսը:
Իշխանությունները կարծում են, որ այդ ստորգետնյա երթուղին օգտագործվել է ոչ միայն միգրանտների կողմից, այլև թմրանյութերը մաքսանենգ ճանապարհով Մեքսիկայից Միացյալ Նահանգներ տեղափոխելու համար:
ԱՄՆ-ի սահմանապահ ծառայության աշխատակիցները հայտնաբերել էին թունելը Էլ Պասոյում հունվարի 9-ին՝ հեղեղատար կոյուղու վիճակը ստուգելիս, թե ինչպես է այն պատրաստ գործել փոթորկի ժամանակ։ Թունելը փակել են:
Մեքսիկայի իշխանությունները նույնպես սկսել են փակել թունելն իրենց կողմից՝ հայտնելով, թե փնտրում են նմանատիպ այլ թունելներ։
«Մենք ընդլայնել ենք որոնողական աշխատանքները՝ հայտնաբերելու այլ թունելներ, եթե դրանք գոյություն ունեն»,- ասել է Սիսներոսը:
Մեքսիկայի կառավարությունը նաև մեծացրել է պարեկների թիվը Խուարեսի մի շարք կարևոր վայրերում՝ ձգտելով պայքարել դեպի ԱՄՆ ուղղություն վերցնող ապօրինի միգրանտների դեմ:
«Մեր հիմնական նպատակն է պաշտպանել միգրանտներին և վստահ լինել, որ նրանք վտանգի տակ չեն դնում իրենց կյանքը՝ փորձելով անօրինական կերպով մուտք գործել Միացյալ Նահանգներ։ Այս թունելի հայտնաբերումից հետո, կենտրոնացած ենք տարածքում այլ թունելների որոնման վրա»,- նշել է ԱՄՆ-ին սահմանակից Մեքսիկայի Չիուահուա նահանգի Հանրային անվտանգության գործակալության ղեկավար Ժիլբերտո Լոյան:
Որոնողական աշխատանքները շարունակվում են, և Մեքսիկայի իշխանությունները վերահաստատել են՝ մտադիր են փակել Միացյալ Նահանգների հետ սահմանի երկայնքով առկա անօրինական ճանապարհները:
