Արհեստական բանականությունը ընդլայնում է իր ներկայությունը ԱՄՆ քաղաքական կյանքում՝ դրամահավաքից մինչև քարոզարշավ: Ամերիկյան օրենսդիրներից ոմանք ձգտում են մեծացնել վերահսկողությունը, թե ինչպես է կիրառվում արհեստական բանականությունը նախընտրակական քարոզարշավի ժամանակ, քանի որ, ըստ նրանց, այն կարող է հանգեցնել քաղաքական գործըթնացների նկատմամբ ընտրողների վստահության անկմանը:
ԱՄՆ-ում թափ հավաքող նախընտրական քարոզարշավի ժամանակ արհեստական բանանականությունն ամենից ցայտուն, թերևս, օգտագործվել է Նյու Հեմփշիրում կայացած փրայմերիզի ժամանակ, երբ հազարավոր ընտրողներ հեռախոսազանգ ստացան, և նախագահ Ջո Բայդենի ձայնով մեկը՝ այսպես ասած, կեղծ Ջո Բայդենը, հորդորում էր չմասնակցել ներկուսակցական ընտրություններին:
«Այս երեքշաբթի կայանալիք քվեարկությունը հանրապետականներին հնարավորություն է տալու կրկին ընտրել Դոնալդ Թրամփին»,- ասում էր կեղծ Ջո Բայդենը:
Նախագահ Բայդենի՝ կեղծված ձայնային հաղորդագրության հեղինակը Լուիզիանայում բնակվող աճպարար Փոլ Քարփենթերն էր, ով այն պատրաստել էր ընդամենը 150 դոլարով։
Your browser doesn’t support HTML5
Արհեստական բանականությունը ընդլայնում է իր ներկայությունը ԱՄՆ քաղաքական կյանքում
Տեղի ունեցածը պատճառ հանդիսացավ, որ դեմոկրատ սենատոր Ռիչարդ Բլումենտալը բարձրաձայնի իր մտահոգությունը․ «Ապատեղեկատվությունն ու դիփ ֆեյքերը ներթափանցում են ամերիկյան հանրություն՝ քաղաքական գովազդի և ապատեղեկատվության տարաբնույթ ձևերի տեսքով, ինչը հնարավոր է դառնում արհեստական բանականության շնորհիվ: Մեր ժողովրդավարության համար այն վտանգ է ներկայացնում»։
Անցած շաբաթ ԱՄՆ Սենատի դատական հանձնաժողովի լսումների ժամանակ՝ նախընտրական քարոզարշավի ժամանակ արհեստական բանականության կիրառման մասին խոսեց հանրապետական սենատոր Ջոշ Հոուլին․ «Առանց պաշտպանական համակարգերի և անվտանգության մեխանիզմների՝ այս տեխնոլոգիայի վտանգները դառնում են ակնհայտ: Կարծում եմ, այժմ հարցն այն է, թե արդյոք պատրաստվում ենք ձեռքներս ծալած հետևել այս աղետալի զարգացմանը»:
Նյու Հեմփշիրում տեղի ունեցածը այլևս չափազանց հասանելի է՝ նշում է արհեստական բանականության միջոցով մարդկային ձայնի մշակմամբ զբաղվող Զոհայիբ Ահմեդը:
«Արհեսատական բանականության տեխնոլոգիաները մատչելի լուծումներ են առաջարկում, որոնցով հնարավոր է ստուգել աուդիո բովանդակությունը»,- ասում է նա:
Սակայն ձեռնարկատեր Բեն Քոլմանը պնդում է՝ նման տեխնոլոգիաների կիրառմանը զուգահեռ՝ անհրաժեշտ են դրանք կարգավորող մեխանիզմներ․ «Առկա են լավ հիմքեր՝ համապետական ու նահանգային մակարդակներում այն կանոնակարգելու համար: Երբ ինչ-որ բան եք ներբեռնում, օրինակ՝ YouTube-ից, այն անցնում է որոշակի ստուգում: Օրինակ, ստուգվում է բռնության առկայությունը տեսանյութում, քանի որ կանոնակարգված է: Նման կանոնակարգումը կարող է վերաբերել նաև արհեստական բանականության միջոցով ստեղծված բովանդակությանը»:
ԱՄՆ Դաշնային ընտրական հանձնաժողովում քննարկվում են այն կանոնները, որոնց համաձայն պետք է արգելվի արհեստական բանականության օգտագործումը նախընտրական գովազդում՝ ընտրողներին միտումնավոր ապակողմնորոշելու նպատակով:
Նյու Հեմփշիր նահանգնի պետքարտուղար Դեյվիդ Սքանլանը Սենատի վերոհիշյալ հանձնաժողովում ունեցած ելույթի ժամանակ նշել է, թե արհեստական բանականության նման կիրառությունը, ինչպես նախագահ Բայդենի կեղծ հաղորդագրության դեպքում էր, կարող է սասանել ընտրողների վստահությունը․ «Կարևոր է վստահ լինել, որ ընտրություններում չի լինի խառնաշփոթ, և որ ընտրողները կհավատան, որ դրանք անցկացվել են արդար և ճշգրիտ՝ հնարավոր ամենաբարձր չափանիշներով: Եթե կորցնենք այդ վստահությունը, ապա այն վերադարձնելը շատ դժվար կլինի»։
Նյու Հեմփշիրում օրենսդիրներն այժմ քննարկում են մի կարգավորում, որը պահանջում է քաղաքական գովազդի հեղինակներից 90 օրվա ընթացքում բացահայտել, թե արդյոք տվյալ բովանդակությունը՝ աուդիոն, ֆոտոն կամ տեսանյութը ստեղծվել է արհեստական բանականության կիրառմամբ: