ԱՄՆ նախագահ Դոնալդ Թրամփը երեքշաբթի հայտարարել է, թե նախատեսում է առաջարկել, այսպես կոչված, «ոսկե քարտեր», որոնք հնարավորություն կտան դիմել ամերիկյան քաղաքացիություն ստանալու համար։ 5 միլիոն դոլար արժողությամբ «ոսկե քարտը» կփոխարինի արդեն 35 տարի գործող ներդրողների համար նախատեսված ԱՄՆ հատուկ վիզային։
«Նրանք կլինեն հարուստ և հաջողակ, մեծ գումարներ կծախսեն, շատ հարկեր կվճարեն և շատ մարդկանց կընդունեն աշխատանքի։ Կարծում ենք, որ չափազանց հաջող [գործ] կլինի»,- ասել է Թրամփը:
ԱՄՆ առևտրի նախարար Հովարդ Լատնիկն նշել է, թե արդեն երկու շաբաթից «Թրամփի ոսկե քարտը» (Trump Gold Card) կգա փոխարինելու հանրահայտ EB-5 վիզային:
EB-5-ը ուժի մեջ մտավ 1990 թվականին՝ օտարերկրյա ներդրումներ ներգրավելու համար, և հասանելի է այն մարդկանց, որոնք մոտ 1 միլիոն դոլար ներդրում են կատարում ԱՄՆ-ում՝ առնվազն 10 աշխատակից ունեցող որևէ ընկերությունում:
Լատնիկի խոսքով՝ «ոսկե քարտը» ներդրողների համար կթանկացնի ԱՄՆ մուտք գործելու գինը և վերջ կդնի խարդախություններին ու «անհեթեթությանը», որոնք, ըստ նրա, բնութագրում են EB-5 ծրագիրը: «Գրին քարտի» նման այն կարող է հիմքեր ստեղծել, որպեսզի անձը հետագայում ստանա ԱՄՆ քաղաքացիություն:
Միացյալ Նահանգների Ներքին անվտանգության նախարարության վերջին տվյալների համաձայն՝ 2022 թվականի սեպտեմբերի 30-ի դրությամբ EB-5 վիզա էր ստացել շուրջ 8 հազար մարդ: 2021 թվականին ԱՄՆ Կոնգրեսում հայտարարեցին, թե EB-5 վիզաների տրամադրումն ուղեկցվում է խարդախության վտանգով և պահանջ հնչեց՝ ստուգել, թե արդյոք ԱՄՆ մուտքի այդ թույլտվությունը տրամադրվում է բացառապես օրինական ճանապարհով:
Ներդրումային վիզաները տարածված են ողջ աշխարհում։ Ըստ Henley & Partners խորհրդատվական ընկերության՝ ավելի քան 100 երկրներ առաջարկում են «ոսկե վիզաներ» հարուստ անհատներին, ներառյալ՝ Մեծ Բրիտանիան, Իսպանիան, Հունաստանը, Մալթան, Ավստրալիան, Կանադան, Իտալիան և բազմաթիվ այլ երկրներ:
Խոսելով ամերիկյան «ոսկե քարտի» մասին՝ նախագահ Թրամփը չի նշել ԱՄՆ-ում աշխատատեղերի ստեղծման պարտադիր պահանջի մասին և հավելել է, թե «ոսկե քարտի» կյանքի կոչման համար Կոնգրեսի հավանությունը պետք չէ:
