Նախագահ Դոնալդ Թրամփը կքննարկի Ուկրաինայի համար նախատեսված օգնությունը վերսկսելու հարցը, եթե մեկնարկեն ուկրիանական հակամարտության հանգուցալուծմանն ուղղված բանակցությունները և ձեռնարկվեն վստահության ամրապնդման միջոցներ՝ չորեքշաբթի հայտարարել է ԱՄՆ ղեկավարի Ազգային անվտանգության հարցերով խորհրդական Մայք Ուոլցը։
Հիշեցնենք՝ հայտնի դարձավ, որ երկուշաբթի նախագահ Թրամփը դադարեցրել է Ուկրաինային հատկացվող ռազմական օգնությունը։ Երեքշաբթի երեկոյան՝ հանդես գալով ԱՄՆ Կոնգրեսի զույգ պալատների առջև, Սպիտակ տան ղեկավարը ասաց, թե նամակ է ստացել Ուկրաինայի նախագահ Վոլոդիմիր Զելենսկուց, ուր վերջինս պատրաստակամություն է հայտնել նստել բանակցությունների սեղանի շուրջ։
Ուոլցի խոսքով՝ նամակը «լավ, դրական առաջին քայլն է», և ներկայում պաշտոնյաները քննարկում են բանակցությունների ժամկետն ու վայրը, ինչպես նաև բանակցային թիմի կազմը։
«Բառացիորեն քիչ առաջ ավարտեցի հեռախոսազրույցը իմ գործընկերոջ՝ Ուկրաինայի ազգային անվտանգության հարցերով խորհրդականի հետ՝ քննարկելով ժամանակը, տեղը, պատվիրակության [կազմը]»,- ասել է Ուոլցը։
«Արդեն խոսում ենք վստահության ամրապնդման միջոցների մասին, որոնք հետո կփոխանցենք ռուսական կողմին և կփորձարկենք նրանց [ռուսների] պատրաստակամությունը [բանակցություններ սկսլեու առումով]»,- Fox News եթերում շարունակել է Մայք Ուոլցը։
Երեքշաբթի Դոնալդ Թրամփը նաև հայտարարեց, թե Ուկրաինան պատրաստ է ԱՄՆ հետ ստորագրել օգտակար հանածոների վերաբերյալ հայտնի համաձայնագիրը, որը, ըստ Վաշինգտոնի, կարևոր է՝ Ուկրաինային ամերիկյան շարունակական աջակցությունն ապահովելու համար:
«Կարծում եմ, եթե մենք կարողանանք համաձայնության գալ այդ բանակցությունների ժամանակ, նրանց հետ առաջ շարժվել և սեղանին դնել վստահության ամրապնդման որոշ միջոցներ, նախագահը լրջորեն կանդրադառնա [Կիևին սպառազինության մատակարարման] դադարի չեղարկմանը»,- ասել է Ուոլցը։ «Պետք է վստահ լինենք, որ երկու կողմերն էլ անկեղծորեն բանակցում են՝ ժամանակավոր, ապա մշտական խաղաղության համար»։
Միևնույն ժամանակ, ԿՀՎ տնօրեն Ջոն Ռաթքլիֆը չորեքշաբթի հայտարարել է, թե ԱՄՆ-ը դադարեցրել է հետախուզական տվյալների փոխանակումը Կիևի հետ։
«Կարծում եմ՝ ռազմական և հետախուզական [տվյալների տրամադրման] դադարը [որը դրդեց Ուկրաինայի նախագահին արձագանքել], [առաջիկայում] կավարտվի»,- Fox Business Network-ին ասել է Ռեթքլիֆը։
«Մենք ուս ուսի կաշխատենք Ուկրաինայի հետ, ինչպես պետք է, ագրեսիային հակազդելու համար..., բայց միևնույն ժամանակ ավելի բարենպաստ պայմաններ կստեղծենք՝ բանակցություններն առաջ մղելու համար»,- ընդգծել է ԱՄՆ Կենտրոնական հետախուզական վարչության ղեկավարը։
