Մինչ այդ «Անորան» արժանացել էր Կանի կինոփառատոնի «Ոսկե արմավենու ճյուղին», և Բեյքերի հեքիաթային սցենարը էրոտիկ պարուհու մասին, ով փախչում է ռուս օլիգարխի որդու հետ, ստեղծվել է ընդամենը 6 միլիոն դոլարով:
Հայազգի դերասաններ Վաչե Թոմասյանի և Կարեն Կարագուլյանի մասնակցությամբ «Անորա» ֆիլմն, ընդհանուր առմամբ, արժանացավ հինգ «Օսկարի»՝ ստանալով մրցանակ լավագույն ֆիլմ, լավագույն դերասանուհի, լավագույն ռեժիսոր, լավագույն օրիգինալ սցենար և լավագույն մոնտաժ անվանակարգերում:
Փաստորեն, բացի լավագույն ֆիլմից, Շոն Բեյքերը հաղթեց լավագույն ռեժիսոր, օրիգինալ սցենար և լավագույն մոնտաժ անվանակարգերում՝ հավասարվելով Ուոլթ Դիսնեյին, ով 1954 թվականին ևս հաղթել էր չորս անվանակարգերում:
Ինչպես ասացինք, «Անորան» ստեղծվել է 6 միլիոն դոլարով, ինչը հոլիվուդյան չափանիշներով փոքր գումար է։ Ֆիլմն առաջ անցավ այնպիսի ստեղծագործությունների հետ մրցապայքարւոմ, ինչպիսիք են «Կոնկլավ» (Conclave) թրիլլերը, հրեա ներգաղթյալների մասին պատմող «Բրուտալիստը» (The Brutalist) և «Չարը» (Wicked) մյուզիքլը:
«Եթե փորձում եք անկախ ֆիլմեր նկարահանել, խնդրում եմ, շարունակեք այդ անել: Մեզ ավելին է պետք և սա ապացույց է»,- ասել է Բեյքերը, ով հայտնի է պոռնոաստղերի, տրանսգենդեր մարմնավաճառների և այլ մարգինալացված մարդկանց մասին կարճամետրաժ ֆիլմեր նկարահանելով:
Լավագույն դերասանուհի անվանակարգում հաղթանակ է տարել ֆիլմի 25-ամյա աստղ Մայքի Մեդիսոնը։ Նա շրջանցել է նաև Դեմի Մուրին, ով «The Substance» ֆիլմում իր դերի համար դիտարկվում էր որպես առաջատար՝ լավագույն դերասանուհի անվանակարգում:
«Մեծացել եմ Լոս Անջելեսում, բայց Հոլիվուդը միշտ հեռու է թվացել։ Այսօր այստեղ գտնվելն ինձ համար իսկապես անհավանական է»,- բեմի վրա ասել է Մեդիսոնը՝ շարունակելով, թե ցանկանում է «շնորհակալություն հայտնել և հարգանքի տուրք մատուցել սեքս-աշխատողների համայնքին»:
«Անորան», որը թողարկվել է անկախ դիստրիբյուտոր Neon-ի կողմից, արդեն իսկ 40 միլիոն դոլար է վաստակել համաշխարհային կինոդիտումների արդյունքում: Համեմատության համար՝ «Չարը» հավաքել է 728 միլիոն դոլար:
«Լավագույն դերասան» անվանակարգում երկրորդ անգամ «Օսկարի» արժանացավ Էդրիեն Բրոուդին՝ «Բրուտալիստը» ֆիլմում ամերիկյան երազանքի հետևից գնացող հրեա ներգաղթյալ ճարտարապետի դերի համար: 51-ամյա դերասանը նախկինում ստացել էր «Օսկար»՝ «Դաշնակահարը» ֆիլմում նկարահնվելու համար, երբ 29 տարեկանում դարձավ «լավագույն դերասան» անվանակարգում ամենից երիտասարդ մրցանակակիրը:
«Դերասանությունը շատ փխրուն մասնագիտություն է։ Անկախ նրանից, թե որտեղ եք գտնվում ձեր կարիերայում, ամեն ինչ կարող է չքվել»,- ասել է Բրոուդին:
Զոի Սալդանան ճանաչվել է երկրորդ պլանի լավագույն դերասանուհի՝ «Էմիլիա Պերես» իսպանալեզու մյուզիքլում կատարած աշխատանքի համար, որը թողարկել է Netflix-ը։
El Mal ֆիլմը արժանացավ «Օսկարի»՝ լավագույն օրիգինալ երգի համար։ Ի դեպ, շաբաթներ առաջ El Mal-ն էր համարվում «լավագույն ֆիլմ» ավանակարգում հաղթելու ամենից մեծ շանսերն ունեցողը, սակայն ամեն ինչ փոխվեց, երբ Կարլա Սոֆյա Գասկոնը վիրավորական գրառումներով հանդես եկավ սոցցանցերում։ Հետևանքն եղավ այն, որ հրապարակավ հայտնի առաջին տրանսգենդեր անձը, ով առաջադրվել էր «լավագույն դերասանուհի» անվականակարգում՝ Կարլա Սոֆյա Գասկոնը, դուրս մնաց հավակնորդների ցանկից, բայց նա ներկա էր կիրակի օրվա արարողությանը:
Կիրան Կալկինն արժանացավ երկրորդ պլանի լավագույն դերասանի մրցանակին՝ «Իրական ցավ» ֆիլմում։
Կալկինը շնորհակալություն է հայտնել կնոջ՝ կատակելով, թե տիկինը խոստացել է իրեն ևս երկու երեխա պարգևել, եթե Կիրանը «Օսկարի» արժանանա։ Զույգն ունի երկու երեխա։
No Other Land վավերագրական ֆիլմը ստացավ վավերագրական «Օսկարը»։ Այն պատմում է Հորդանան գետի արևմտյան ափին բնակվող պաղեստինցիների դիմադրության մասին՝ ընդդիմանալով իսրայելցի զինվորներին, որոնք քանդում են տները և վտարում բնակիչներին՝ ռազմական ուսումնամարզական բազա ստեղծելու համար:
«Լավագույն անիմացիոն լիամետրաժ ֆիլմ» անվանակարգում «Օսկարը» բաժին հասավ
«Հոսքին», որը Լատվիայից «Օսկար» ստացած առաջին ստեղծագործությունն է:
«Լավագույն միջազգային ֆիլմի» համար մրցանակը շնորհվեց բրազիլական «Ես դեռ այստեղ եմ» ֆիլմին։
Այս տարվա «Օսկար» մրցանակաբաշխությունը սկսվեց Արիանա Գրանդենի ու Սինթիա Էրիվոնի կատարմամբ, իսկ երեկոն վարում էր ամերիկացի հեռուստատեսային հաղորդավար, կատակերգու Քոնոն Օ'Բրայենը, ով միջոցառման ընթացքում բեմ հրավիրեց Լոս Անջելեսի հրշեջների խմբին՝ շնորհակալություն հայտնելով նրանց այս հունվարին անտառային հրդեհների դեմ պայքարի համար։
Նշենք, որ «Օսկարի» արձանիկների հաղթողներին ընտրում են մոտ 11 հազար դերասաններ, պրոդյուսերներ, ռեժիսորներ և կինոարվեստի վարպետներ, որոնք կազմում են ամերիկյան Կինոարվեստի և գիտության ակադեմիան:
