Ուկրաինայում շատերը չեն թաքցնում իրենց անհանգստությունը, որ երկիրը կարող է մենակ մնալ ռուսական ագրեսիայի առջև: ԱՄՆ նախագահ Դոնալդ Թրամփի պաշտոնամուտից մեկ շաբաթ անց Կիևի փողոցներում մարդիկ հույս էին հայտնում, որ գործը դրան չի հասնի։
«Իսկապես, հույս ունեմ, որ նախագահ Դոնալդ Թրամփը կգործադրի բոլոր ջանքերը և կկանգնեցնի ագրեսոր Պուտինին։ Կարող են լինել զիջումներ, որպեսզի մեր զինվորները դադարեն զոհվել»,- ասում է Կիևի բնակիչ Վոլոդիմիրը:
«Ցանկացած համաձայնագիր, հավանաբար, Ուկրաինայի օգտին չի լինի։ Մեզ ստիպելու են գնալ զիջման»,- շարունակում է Կիևի բնակիչ Լիլյան:
«Լսե՛ք, մենք պետք է կախված լինենք մեզնից և ոչ թե արտաքին ուժերից: ԱՄՆ վարչակազմն ընտրողների համար ունի կոնկրետ ծրագրեր և պարտավորություններ»,- նշում է Կիևի բնակիչ Նազարը:
Ինչպես հայտնի է, իր նախընտրական արշավի ժամանակ Թրամփը խոստացել էր վերջ տալ ուկրաինական պատերազմին: Սակայն տակավին հայտնի չէ ամերիկյան նոր վարչակազմի հստակ ռազմավարության մասին, թե ինչպես է այն պատրաստվում հասնել այդ նպատակին՝ ասում է վերլուծաբան Միկոլա Բիելիեսկովը։
«Ուկրաինան և Ռուսաստանը տարբեր դիրքորոշումներ ունեն։ Ռուսաստանը պահանջում է գրավյալ [ուկրաինական] տարածքները և ՆԱՏՕ-ի բաց դռների քաղաքականության դադարեցում, բացի այդ՝ Ուկրաինայի չեզոքություն և որ խիստ սահմանափակումներ կիրառվեն Ուկրաինայի պաշտպանական ուժերի նկատմամբ»:
Նման պահանջները կարող են հանգեցնել Ուկրաինայի վերջնական փլուզմանը՝ ասում է Բիելիեսկովը։
Ի հավելումն՝ Ռուսաստանի օկուպացրած ուկրաինական արևելյան և հարավային նահանգների գրավման ճանաչումը Կիևի կողմից կնշանակի Ուկրաինայի դիրքորոշման զգալի փոփոխություն:
«Նման բան կարող է լինել օրենսդրության կամ նույնիսկ՝ սահմանադրության փոփոխության արդյունքում, բայց դա կլինի բացառապես խորհրդարանի միջոցով: Ուկրաինայի հասարակությունը պետք է որոշի»,- ասում է Ուկրաինայի խորհրդարանի պատգամավոր Սոլոմյա Բոբրովսկան:
Սեփական զինված ուժերը կրճատելու համաձայնությունը Ուկրաինան անպաշտպան կդարձնի՝ ընդգծում է ուկրաինացի պրոֆեսոր Վալերի Պեկարը։ Նա կարծում է, որ քննարկման ենթակա է միայն ՆԱՏՕ-ի հարցը։
«Եթե ես բանակցություններ վարեի Ուկրաինայի անունից, հաճույքով կխոստանայի 10 տարի չմիանալ ՆԱՏՕ-ին։ Նախ՝ մեզ ոչ ոք այնտեղ չի հրավիրում։ Մենք կարող ենք խոստանալ, և աշխարհաքաղաքական իրավիճակը կարող է փոխվել մի քանի տարի անց»։
Խնդիրն այն է, որ վերոհիշյալը բավարար չէ Պուտինի համար՝ ասում է Բիելիեսկովը և շարունակում, թե ԱՄՆ նախկին նախագահ Բայդենը փորձել է Պուտինին առաջարկել հետաձգել ՆԱՏՕ-ին Կիևի հնարավոր անդամակցության հարցի քննարկումը։
«Բայդենը Պուտինին ասել է, որ մոտ ապագայում ՆԱՏՕ-ին Ուկրաինայի անդամակցության հավանականությունը գրեթե զրո է: Պուտինը հրապարակայնորեն հաստատեց այդ խոսակցությունը անցած տարվա վերջին և ասաց, որ իրենք բավարարված չեն դրանով»,- հավելում է նա:
Բիելիեսկովն ասում է, որ Ուկրաինայի բանակցային դիրքերը պետք է ամրապնդվեն:
Պեկարը վստահ է, որ Պուտինը կշարունակի ռազմական գործողությունները:
«Պուտինը կարծում է, որ ամեն ինչ լավ է ընթանում և չի նստի բանակցությունների [սեղանի մոտ]։ Նախագահ Թրամփը խոստանում է նվազեցնել նավթի [միջազգային] գները: [Այդ պարագայում] Ռուսաստանի տնտեսությունը կփլուզվի, եթե նավթի գները կտրուկ իջնեն, բայց դա պահանջում է միջազգային շատ դերակատարների համագործակցություն»,- ասում է Պեկարը:
Հայտնի է՝ ԱՄՆ նախագահ Դոնալդ Թրամփը հայտարարել է, թե մտադիր է առաջիկայում խոսել Պուտինի հետ ուկրաինական պատերազմը վերջ տալու հարցով՝ հավելելով, թե «Ուկրաինան պատրաստ է գործարքի գնալ»։
Սակայն խնդիրն, ըստ Ուկրաինայի նախագահ Վոլոդիմիր Զելենսկու, այն է, որ Պուտինը ցանկանում է շարունակել պատերազմը։
