ԱՄՆ նորընտիր նախագահ Դոնալդ Թրամփը հայտարարել է, թե նոր Սպիտակ տանը Դեյվիդ Սաքսն է լինելու արհեստական բանականության ու կրիպտոարժույթի գծով իր խորհրդականը, կամ ոլորտը կարգավորող «ցարը», ինչպես նրան սկսել է կոչել ամերիկյան մամուլը։
Սաքսը Սիլիկոնյան հովտի երկարամյա ձեռնարկատեր է, և Թրամփի ներկայացմամբ՝ նա պետք է օգնի ԱՄՆ-ն հեռացնել տեխնոլոգիական հսկաների ցուցաբերած կողմնապահությունից և գրաքննությունից:
Սանտա Կլարայի համալսարանի էթիկայի գծով պրոֆեսոր Ջոն Պելիսերոյի խոսքով՝ Սաքսը շատ անելիքներ ունի:
«Ցանկացած մեկի համար մարտահրավեր է լինելու՝ փորձել կառավարել վեր հառնող երկու տեխնոլոգիաներ և ֆինանսներին վերաբերող նոր մեթոդներ, որոնք արագ զարգանում են»,- ասում է նա:
Սաքսը մերժել է հարցազրույց տալու խնդրանքը, սակայն նա հաճախ է խոսել խոշոր տեխնոլոգիական ընկերությունների իշխանությունը սահմանափակելու անհրաժեշտության մասին:
«Չենք ունենալու ստարտափային առողջ էկոհամակարգ, չենք ունենալու ազատ խոսք և չենք ունենա մրցակցություն տարբեր ընկերությունների միջև, որպեսզի փորձենք լինել ավելի նորարար»,- ասել է Սաքսը:
Սաքսը նաև բազմիցս անդրադարձել է կրիպտոարժույթի ներուժին:
«Այն, ինչ իրենից ներկայացնում է բիթքոյնը․․․, այն այլ տեսակի արժույթ է, որի թիկունքին կանգնած չէ որևէ կառավարություն, բայց նրա թիկունքին մաթեմատիկան է ու գաղտնագրումը: Կարծում եմ, բազմաթիվ մարդիկ կարող են ժամանակի ընթացքում աստիճանաբար գալ այն մտքին, որ այն փողի ավելի լավ ձև է»,- ասել է նա:
Բայդենի վարչակազմում, սակայն, չէին թաքցնում իրենց մտահոգությունը կրիպտոարժույթների շուկայի առնչությամբ, թե առկա են հնարավոր ֆինանսական ռիսկեր:
Այնինչ կրիպտոարժույթի օգտին հանդես եկողները ոգևորված են, որ Թրամփը առաջնահերթություն է տալիս ոլորտին:
«Շատ կարևոր է ունենալ մեկին, ով կկարողանա համակարգել աշխատանքը, կհամոզվի, որ [պետական] ճիշտ գործակալությունները խոսում են միմյանց հետ, և կմիջամտի, եթե գործակալությունները ինչ-որ բանի շուրջ համաձայնության չեն գա։ Սա շատ կարևոր է»,- ասում է Բլոքչեյն ասոցիացիայի գործադիր տնօրեն Քրիստին Սմիթը:
Պելիսերոն ասում է, թե կարող է շահերի բախում առաջանալ, քանի որ Սաքսը պետության անունից զբաղվելու է ոլորտով, և զուգահեռաբար նրան պատկանող մասնավոր ընկերությունը շարունակելու է գործել նույն բնագավառում:
«[Նման պայմաններում] հանրության համար դժվար կլինի ընկալել, թե ինչպես է Թրամփի վարչակազմը պատրաստվում մոտենալ արհեստական բանականության կամ կրիպտոարժույթի քաղաքականությանը, և որ դա արվելու է հանրային շահերից ելնելով»,- հավելում է նա:
Ըստ լրատվամիջոցների՝ նոր Սպիտակ տանը Սաքսը աշխատելու է կես դրույքով, և ԱՄՆ Սենատի կողմից հաստատվելու կարիք չի ունենա:
