Եվ այսպես, Պենտագոնի ղեկավարի պաշտոնին Դոնալդ Թրամփն առաջարկել է նախկին հեռուստահաղորդավար Փիթ Հեգսեթին, ով, ճի՛շտ է, ծառայել է ԱՄՆ զինված ուժերում, եղել է Իրաքում ու Աֆղանստանում։
«Ժամանակն է ղեկը հանձնել ինչ-որ մեկին, ում կոշիկները փոշի են տեսել: Փոփոխություններ կատարել ունակ որևէ մեկին, ով չունի որևէ շահագրգռվածություն որոշակի ընկերությունների, հատուկ ծրագրերի կամ հավանություն ստացած պատումների առնչությամբ: Իմ միակ հետաքրքրությունը վերաբերում է պատերազմի դաշտում գտնվող մարտիկին»,- ասել է Հեգսեթը։
ԱՄՆ պաշտպանության նախարարների նշանակման ժամանակ թեկնածուների մեծ մասը, սովորաբար, աջակցություն են ստանում երկու կուսակցություններից էլ։ Հեգսեթի պարագայում իրավիճակը, կարծես, այլ է:
Դեմոկրատ սենատոր Ջեք Ռիդը Սենատի Զինուժի գծով հանձնաժողովի անդամ է։
«Ես քվեարկել եմ ձեզ նախորդած բոլոր թեկնածուների օգտին, այդ թվում՝ Թրամփի առաջին վարչակազմում: Ցավոք, չունեք [ԱՄՆ] պաշտպանության նախարարի պաշտոնը զբաղեցնելու համար անհրաժեշտ խառնվածք, սառնասրտություն ու կոմպետենտություն»,- Պենտագոնի ղեկավարի պաշտոնում Փիթ Հեգսեթին հաստատելու նպատակով Սենատում կայացած լսումների ժամանակ ասել է սենատոր Ջեք Ռիդը։
Փոխարենը Հեգսեթը գովասանքի է արժանացել հանրապետականների կողմից, որոնց խոսքով՝ նախորդած տարիներին Պենտագոնը թուլացրել է իր ուժը:
«Կասկած չունեմ, որ նա պատրաստվում է վերադարձնել Պենտագոնին նրա հիմնական առաքելությանը` կռվելու պատրաստակամությանը: Խոսքը զինվորական ոգու մասին է, որը կհարգեն մեր թշնամիները և որը կպահպանի խաղաղություն»,- ասել է հանրապետական գործիչ Մայքոլ Ուոլցը, որին Թրամփը պատրաստվում է նշանակել ԱՄՆ նախագահի ազգային անվտանգության գծով խորհրդական։
Հեգսեթին ուղղված դեմոկրատների հարցերը վերաբերում էին նրա՝ ենթադրյալ վատ վարքագծին և պետական համակարգում կառավարման փորձի բացակայությանը:
«Մենք աշխատանքի ենք ընդունում ձեզ, որպեսզի դառնաք աշխարհի ամենաբարդ, ամենամեծ կազմակերպություններից մեկի գործադիր տնօրենը: Մենք այստեղ տնօրենների խորհուրդն ենք: Տեղյակ չեմ որևէ կորպորատիվ տնօրենների խորհրդի մասին, որը խոշոր ընկերությունում աշխատանքի կընդունի գլխավոր տնօրենի, եթե նա գա ու ասի՝ գիտեք, նախկինում վերահսկում էի 100 հոգու»,- ասել է հանրապետական սենատոր Գերի Փիթերսը:
Հեգսեթի ներկայացմամբ՝ Չինաստանի ագրեսիվ պահվածքին հակազդելը մնալու է Պենտագոնի առաջնահերթությունը:
«Մենք կաշխատենք մեր գործընկերների և դաշնակիցների հետ՝ զսպելու Հնդկակական-Խաղաղօվկիանոսյան տարածաշրջանում կոմունիստ չինացիներից եկող ագրեսիան»,- ասել է Հեգսեթը:
Բայց երբ սենատորները հարցրեցին, թե, օրինակ, ASEAN-ի անդամ տասը երկրներից որոնք են ԱՄՆ դաշնակիցներն ու գործընկերները, Հեգսեթը խուսափեց մանրամասնել:
«Պարոն Հեգսեթ, այդ երկրներից ոչ մեկը ASEAN-ի անդամ չէ: Ձեր նշած երեք երկրներից ոչ մեկը ASEAN-ում չէ։ Առաջարկում եմ փոքր-ինչ տնային աշխատանք կատարել նախքան այս կարգի բանակցություններին նախապատրաստվելը»,- արձագանքել է դեմոկրատ սենատոր Թեմի Դաքվորթը։
Թե՛ դեմոկրատների, թե՛ հանրապետականների կողմից Հեգսեթը սուր քննադատության արժանացավ Պենտագոնի մարտական ստորաբաժանումներում կանանց ներգրավածության դեմ ուղղված իր խոսքերի պատճառով:
«Ուղղակի ասում եմ, որ կանայք չպետք է լինեն մարտական դերում: Այն մեզ ավելի արդյունավետ, ավելի մահաբեր չի դարձրել, կռվելը բարդացրել է»,- պատասպանել է Փիթ Հեգսեթը։
«Որպես պաշտպանության նախարար՝ կաջակցե՞ք, որպեսզի կանայք հնարավորություն ունենան շարունակել ծառայությունը մարտական դերերում»,- հարցրել է հանրապետական սենատոր Ջոնի Էրնսթը:
«Այո, կանայք հնարավորություն կունենան մասնակցել ցամաքային մարտական գործողություններին՝ հաշվի առնելով բարձր չափանիշները»,- արձագանքել է Հեգսեթը:
«Ամերիկայի ձայնին» փոխանցված Պենտագոնի պարզաբանման մեջ նշված է, որ «զինվորական ծառայության չափորոշիչները չեն իջեցվել», և «մարտական ու մասնագիտացված ստորաբաժանումները պահպանում են խիստ չափանիշներ՝ ապահովելու բացառապես որակյալ անձանց ընտրությունը՝ անկախ սեռից»:
Սենատոր Էլիզաբեթ Ուորենը մտահոգություն է հայտնել, որ Հեգսեթը փոխել է իր հրապարակային մոտեցումը՝ Սենատում հաստատվելու համար:
«Հուսով եմ՝ հասկանում եք, որ այժմ բանակում ծառայող շատ կանայք կարող են մտածել՝ եթե դուք կարող եք այդքան արագ փոխել ձեր վաղեմի ու ագրեսիվ կերպով առաջ մղվող հայացքները ընդամենը 32 օրում, ապա [Պենտագոնի ղեկավարի պաշտոնում] հաստատվելուց 32 օր անց չե՞ք վերադառնա հնին, թե «կարճ ասած, մարտական գործողությունները կանանց տեղը չեն»»,- ասել է Ուորենը:
Հեգսեթին անհրաժեշտ է Սենատի մեծամասնությունը՝ Պենտագոնի ղեկավարի պաշտոնում հաստատվելու համար։ Թեև ԱՄՆ Կոնգրեսի վերին պալատի 100 աթոռներից 53-ը հանրապետականներին են, սակայն պարզ չէ, թե ինչպես կքվեարկի յուրաքանչյուր սենատոր:
